ՑՈՒԼԸ՝ ՀԱՄԱՌՈՒԹՅՈՒՆ, ԿԱՅՈՒՆՈՒԹՅՈՒՆ, ԱԶՆՎՈՒԹՅՈՒՆ

Azg. 27-12-2008-Գալիք 2009-ը համարվում է Դեղին ցուլի տարի, որը իր բուն իրավունքները կստանձնի հունվարի 26-ից: Ցուլի նշանը խորհրդանշում է կայունություն, համառություն եւ ազնվություն: Տարվա խորհրդանշող գույներն են մուգ կարմիրը, կանաչի բոլոր երանգները, դեղինը, մանուշակագույնը, սպիտակը, սեւը, վարդագույնի բոլոր երանգները: Հատկապես դեղինը՝ հողի էներգիայի խորհրդանիշն է: Տոնական սեղանին խորհուրդ է տրվում ավելի շատ բուսական սննդամթերքներ դնել ու բացառել մսեղենը: Իսկ եթե շատ սեր ունեք մսեղենի հետ, ապա դրանք կերեք միայն խոհանոցում: Հարգի են տարատեսակ աղցանները, քաղցրավենիքները: Բնակարանը տոնական տեսքի բերելու ընթացքում ուշադրություն դարձրեք դասական ոճին եւ գույների ներդաշնակությանը, չմոռանալով Ցուլի տարվա նախընտրած գույները: Ձեր տոնական հագուստները նույնպես ընտրեք տարվա գույներին համապատասխան: Տարին հաջողություն կբերի նրանց, ովքեր ավանդականը, նորն ու գեղեցիկը զուգորդված կներմուծեն իրենց կյանք: Տարվա կարեւորագույն պահանջն է՝ չշահագործել դիմացինին եւ զոհի դեր չստանձնել: Բարի Ամանոր ու Սուրբ ծնունդ: