Մարտին Համայնքների պալատը քննարկելու է Հայոց ցեղասպանության օրինագիծը

/PanARMENIAN.Net/ 16.03.2010 - Մեծ Բրիտանիայի Համայնքների պալատ է մտել Օսմանյան կայսրությունում Հայոց ցեղասպանության Հիշատակի օրվա ճանաչման օրինագիծը: Ինչպես հաղորդում է UPI-ը, օրինագիծը քննարկվելու է այս ամիս: «Թուրքիան հետեւում է գործընթացին եւ կարծում, որ օրինագիծը հաջողության շանսեր չունի»,- հայտարարել է Haringey լոնդոնյան խորհրդի անդամ Նիլգուն Կանվերը: Մարտի 4-ին ԱՄՆ Ներկայացուցիչների պալատի արտաքին հարաբերությունների կոմիտեն 23 «կողմ» եւ 22 «դեմ» ձայներով ընդունեց Հայոց ցեղասպանության մասին 252 բանաձեւը: Պրոֆիլային կոմիտեում քվեարկությունից հետո բանաձեւը Ներկայացուցիչների պալատ կուղարկվի վերջնական քվեարկության համար: Հայոց ցեղասպանությունը, իրագործվել է Օսմանյան կայսրությունում 1915-1923թթ.: Այն XX դարի առաջին ցեղասպանությունն էր, որի նախաձեռնողները երիտթուրքերն էին: Ցեղասպանության ժամանակ ոչնչացվեց վեց հայկական վիլայեթների բնակչությունը` շուրջ 1,5 մլն հայ: Եվս կես միլիոնը սփռվեց աշխարհով մեկ` սկիզբ դնելով հայկական Սփյուռքին: Ժամանակակից Թուրքիան ժխտում է Հայոց ցեղասպանության պատմական փաստը եւ վարում է այդ փաստի ժխտման ներքին ու արտաքին քաղաքականություն: Հայոց ցեղասպանության ճանաչման անհրաժեշտության մասին խոսում են միայն առանձին թուրք մտավորականներ, որոնց թվում են պատմաբան Թաներ Աքչամն ու Նոբելյան մրցանակի դափնեկիր Օրհան Փամուքը: