Ի՞նչ է ակնկալում հայկական կողմն Արձանագրություններից. փոխարտգործնախարարի մեկնաբանությունը

Tert.am- 18-10-2009- «Հայ-թուրքական արդեն ստորագրված Արձանագրություններից հետո ի՞նչ սպասումներ ունի հայկական կողմն այս կարգավորման գործընթացից» հարցն է Tert.am-ն ուղղել Հայաստանի փոխարտգործնախարար Շավարշ Քոչարյանին։ «Առաջին հերթին, այն ակնկալիքները, որոնք կան Արձանագրություններում` դիվանագիտական հարաբերությունների հաստատում, սահմանի բացում և կանոնավոր բեռնափոխադրումների ռեժիմ, ինչպես դա ընդունված է բաց սահմանի դեպքում»,- ի պատասխան մեր հարցի հայտարարել է փոխարտգործնախարարը։ Հնարավո՞ր են արդյոք խոչընդոտներ Արձանագրությունների վավերացման ճանապարհին` հատկապես Թուրքիայի կողմից հարցին ի պատասխան` Շավարշ Քոչարյանը պատասխանել է. «Իհարկե, չեմ բացառում»։ Միևնույն ժամանակ նա նշել է, որ չի ցանկանում դեպքերից առաջ ընկնել։ Փոխարտգործնախարարի խոսքով` մեկ տարի առաջ Թուրքիայի նախագահի այցով սկիզբ դրվեց մի բարդ գործընթացի, որի արդյունքը եղավ Արձանագրությունների ստորագրումը։ Վավերացման ճանապարհին հնարավոր խոչընդոտների մասին խոսելիս` Շավարշ Քոչարյանն ասել է, որ թե Թուրքիան, թե Հայաստանը խնդիրներ ունեն։ Ըստ նրա` Հայաստանը, օրինակ, խնդիր ունի մասնավորապես սփյուռքահայության հետ, որը, ըստ փոխնախարարի, սովոր էր մինչ այժմ եղած իրավիճակին. այսինքն, երբ չկային հարաբերություններ Թուրքիայի հետ, իսկ հիմա` նոր իրավիճակում կա մտածելակերպի փոփոխություն։ Հայաստանի փոխարտգործնախարարը, սակայն, հատուկ ընդգծել է, որ այդ փոփոխությունը երբեք չի ենթադրում Հայոց ցեղասպանության փաստը կասկածի տակ դնելը կամ այդ փաստի միջազգային ճանաչման գործընթացը կասեցնելը։