Երեւանում սկսվել է Հայ ազգային կոնգրեսի ցույցը

/PanARMENIAN.Net/ 08.01.2010 - Երեւանում սկսվել է Հայ ազգային կոնգրեսի (ՀԱԿ) ցույցը: Վարդան Մամիկոնյանի հուշարձանի մոտ հավաքվածները` մոտ 400 ՀԱԿ կողմնակիցներ, մտադիր են իրենց օժանդակությունը հայտնել «Հայկական ժամանակ» թերթի խմբագիր, ներկա պահին բանտարկության մեջ գտնվող Նիկոլ Փաշինյանին, որը ՀՀ Ազգային Ժողովի պատգամավորի թեկնածու է: Ցույցը բացած ՀԱԿ մեջ մտնող նախկին կառավարող ՀՀՇ կուսակցության վարչության անդամ Արամ Մանուկյանը հաղորդեց, որ հաջողության հասնելու համար նախընտրական քարոզարշավի մեջ կներգրավվեն Հայ ազգային կոնգրեսի բոլոր քաղաքական ուժերը: Ցույցին ներկա են ՀԱԿ առաջնորդ Լեւոն Տեր-Պետրոսյանը, Հայաստանի Ժողովրդական կուսակցության առաջնորդ Ստեփան Դեմիրճյանը, «Հանրապետություն» կուսակցության քաղխորհրդի նախագահ Արամ Սարգսյանը, ՀՀՇ վարչության նախագահ Արարատ Զուրաբյանը, Հայաստանի գլխավոր դատախազի նախկին տեղակալ Գագիկ Ջանհիրյանը: Հայ ազգային կոնգրես: 2008թ. փետրվարի 19-ի ընտրություններից առաջ նախագահի թեկնածու, Հայաստանի առաջին նախագահ Լեւոն Տեր-Պետրոսյանի շուրջ նախընտրական դաշինք ձեւավորվեց, որը ոչ պաշտոնապես սկսեց համաժողովրդական շարժում կոչվել, եւ որի կազմի մեջ մտան ավելի քան 20 քաղաքական կուսակցություններ ու նախաձեռնություններ: 2008թ. մայիսի 2-ին Համաժողովրդական շարժման 2-րդ համագումարում Լեւոն Տեր-Պետրոսյանն առաջադրեց Հայ ազգային կոնգրեսի ստեղծման գաղափարը: 2008թ. օգոստոսի 1-ին ցույցի ժամանակ կայացավ Հայ ազգային կոնգրեսի պաշտոնական հաստատումը: ՀԱԿ հիմնական պահանջները քաղբանտարկյալների ազատ արձակումն է, քաղաքացիների սահմանադրական իրավունքների վերականգնումը եւ արտահերթ ընտրությունների անցկացումը: