Հայաստանի ԱԳՆ ղեկավար. Ադրբեջանական քարոզչությունը ԵԱՀԿ չափանիշների բացահայտ խախտում է

News.am 6-4-2010- Հայաստանում ժողովրդավարական բարեփոխումների ընթացքը եւ այդ ոլորտում ձեռնարկվող քայլերն են քննարկվել այսօր՝ ապրիլի 6-ին Հայաստանի արտաքին գործերի նախարար Էդվարդ Նալբանդյանի եւ ԵԱՀԿ Ժողովրդավարական հաստատությունների եւ մարդու իրավունքների գրասենյակի (ԺՀՄԻԳ) ղեկավար Յանեշ Լենարչիչի հանդիպմանը: Հայաստանի ԱԳՆ մամուլի ծառայությունից NEWS.am-ին հայտնում են, որ հանդիպման ժամանակ քննարկվել են նաեւ Հայաստան-ԵԱՀԿ/ԺՀՄԻԳ համագործակցությանն առնչվող հարցեր: Նախարար Նալբանդյանը նշել է, որ Երեւանը կարեւորում է համագործակցությունը գրասենյակի հետ եւ պատրաստ է շարունակելու սերտ համագործակությունն այդ ուղղությամբ: Զրույցի ընթացքում արծարծվել է գրասենյակի գործունեությունը ընտրական գործընթացների բարելավման եւ դիտորդական առաքելություն իրականացնելու հարցում, որի արդյունքների ու եզրակացությունների շուրջ քննարկումներն ու աշխատանքն օգտակար են այդ ոլորտում առաջընթաց գրանցելու համար: Հայաստանի արտաքին քաղաքական գերատեսչության ղեկավարը ԺՀՄԻԳ-ի տնօրենի ուշադրությունը հրավիրել է Ադրբեջանի կողմից հակահայկական ու ազգային թշնամանք սերմանող քարոզչության վրա` նշելով, որ դա ԵԱՀԿ չափանիշների բացահայտ խախտում է: