Աշխարհում 5 միլիարդատեր հայ կա. Forbes-ը հրապարակել է միլիարդատերերի հերթական աղյուսակը

Tert.am. 10-3-2011- Ամերիկյան հեղինակավոր Forbes ամսագիրը հրապարակել է աշխարհի ամենահարուստ մարդկանց հերթական վարկանշային աղյուսակը, որը երկու պատմական ռեկորդներ է սահմանել՝ միլիարդատերերի քանակը հասել է 1210-ի, նրանց ընդհանուր ունեցվածքը՝ 4.5 տրլն դոլարի։ Այդ գումարն, ի դեպ, զգալիորեն գերազանցում է աշխարհում ՀՆԱ-ի ծավալով 4-րդ տեղում գտնվող Գերմանիայի ՀՆԱ-ն և մոտ է երրորդ տեղում գտնվող Ճապոնիայի ՀՆԱ-ին։ Ամենաշատ աճը ապահովել են ԲՌՀՉ-ի (Բազիլիա, Ռուսաստան, Հնդկաստան, Չինաստան) երկրները, որոնց բաժին է ընկնում նորահայտ 214 միլիարդատերերից 108-ը։
Վարկանշային աղյուսակի առաջին երեք հորիզոնականներն անցյալ տարվա համեմատությամբ չեն փոխվել. աշխարհի ամենահարուստ մարդը մեքսիկացի մեդիամագնատ Կառլոս Սլիմ Էլուն է, որը մեկ տարվա ընթացքում իր ունեցվածքը մեծացրել է 20.5 մլրդ դոլարով, այսինքն՝ Հայաստանի ՀՆԱ-ն ավելի քան երկու անգամ գերազանցող չափով։ Այժմ Սլիմ Էլուի ունեցվածքը գնահատվում է 74 մլրդ դոլար։ 2-րդ տեղում Microsoft ընկերության հիմնադիր և այս աղյուսակի երբեմնի երկարամյա առաջատար Բիլ Գեյթսը երկրորդ տեղում է՝ 56 մլրդ դոլար ունեցվածքով։ Նրան հաջորդում է խարիզմատիկ ներդրող Ուորեն Բաֆեթը՝ 50 մլրդ դոլար ունեցվածքով։
Գրեթե բոլոր զարգացող երկրները աճ են արձանագրել միլիարդատերերի քանակով, սակայն ամենաարագը հարստանում են Ասիական-խաղաղօվկիանոսյան շրջանի երկրները։ Այստեղ ապրում է 332 միլիարդատեր, այսինքն աշխարհի միլիարդատերերի քառորդից ավելին։ Իսկ որպես առանձին երկիր, դեռևս անվիճելի առաջատարի դերում հանդես է գալիս ԱՄՆ-ն, որը սակայն աստիճանաբար զիջում է իր դիրքերը։ ԱՄՆ-ի միլիարդատերերի միայն 6%-ն են նորահայտ, մինչդեռ Չինաստանում այդ ցուցանիշը 47% է, իսկ Ռուսաստանում՝ 30%։
Ռուսաստանի ամենահարուստ մարդը Նովոլիպեցկի մետալուրգիական կոմբինատի սեփականատեր Վլադիմիր Լիսինն է, որն իր 15.8 մլրդ ունեցվածքով զբաղեցնում է 14-րդ տեղը։
Անցյալ տարվա արդյունքներով ամենահաջողակ ընկերությունը ներկայում 50 մլրդ դոլար գնահատվող Facebook-ն է, որը «լույս աշխարհ է բերել» վեց նոր միլիարդատերերի։ Նրա հիմնադիր Մարկ Ցուկերբերգի կարողությունը մեկ տարվա ընթացքում ավելացել է 3.4 անգամ և ներկայում կազմում է 13.5 մլրդ դոլար։
Աշխարհի ամենահարուստ հայը շարունակում է մնալ Քըրք Քրքորյանը։ 93-ամյա բիզնեսմենի կարողությունը գնահատվում է 3.5 մլրդ դոլար։ Աղյուսակում տեղ են գտել ևս 4 հայ միլիարդատերերի անուններ, որոնք բոլորն էլ ներկայացնում են Ռուսաստանը։ 1.5-ական միլիարդ դոլարով աշխարհում 833, իսկ Ռուսաստանում 65-րդ տեղն են զբաղեցնում ապահովագրական ոլորտը ներկայացնող «Ռեսո Գարանտիա» ընկերության համասեփականատերեր եղբայրներ Սերգեյ և Նիկոլայ Սարկիսով եղբայրներն ու «Ռոսգոսստրախ» ընկերության ղեկավար և հիմնական բաժնետեր Դանիլ Խաչատուրովը։ Աշխարհում 879, իսկ Ռուսաստանում 72-րդ տեղն է զբաղեցնում «Տաշիր» խմբի հիմնադիր Սամվել Կարապետյանը։
Միլիարդատերերի ցանկից բացակայում է «Տրոյկա Դիալոգ» խմբի ղեկավար Ռուբեն Վարդանյանի անունը։