Ու. Ջաֆարով. Ադրբեջանական բանակում սպանությունները, բռնաբարությունները շարունակվում են

Panorama.am.24-6-2011- Այս տարվա փետրվարի 20-ին Գյոգյոլի շրջանում տեղակայված Ադրբեջանի բանակի Շամխորի կորպուսի կազմի մեջ մտնող զորամասերից մեկում զինծառայողը գնդակահարել էր 6 զինծառայողի ու ինքնասպան եղել: Սակայն իրադարձության պատճառները մինչ այժմ չեն բացահայտվել: Ադրբեջանի նախագահի հրամանով Շամխորի կորպուսի հրամանատար Չինգիզ Շաֆիևը զբաղեցրած պաշտոնից հեռացվել է: Ենթադրվում էր, որ դրանից հետո այդ զորամասում անկարգությունները կվերանան, սակայն ստացվող լուրերը հիմք են տալիս ասելու, որ այդտեղ ոչինչ էլ չի փոխվել: Հունիսի 19-ին Շամխորի կորպուսի` Ղազախի շրջանում տեղակայված զորամասում զինվոր Ֆիքրեթ Հումբաթովը ինքնասպանության նպատակով սեփական ավտոմատ հրազենով կրակել է իր կզակին: Ինքնասպանության դիմած զինվորի վիճակը խիստ ծանր է:
«Ենի Մուսավաթ»-ի հետ զրույցում ռազմական փորձագետ Ուզեիր Ջաֆարովն ասել է, որ Շամխորի կորպուսի զորամասերում իրար հետևից տեղի ունեցող իրադարձությունները հիմք են տալիս ասելու, որ այդ զորամիավորումում անկարգություն և անկազմակերպվածություն է տիրում:
«Զինվորների ինքնասպանությունը, զինակիցների` միմյանց սպանությունը, բռնաբարությունները զինվորական կանոնադրության բացակայության ցուցանիշ է: Բանակում համատարած կաշառակերություն և կոռուպցիա է տիրում: Դա վերացնելու համար անհրաժեշտ է արմատական բարեփոխումներ անցկացնել: Զինվորների` միմյանց վրա կրակելու, ինքնասպանության դիմելու հիմքում ընկած է հրամանատարների նյութական շահերի երեսից կարգ ու կանոնի բարձիթողի վիճակը»,- ասել է փորձագետը:

Հատկանշական է, որ տարվա սկզբին ադրբեջանական բանակում տեղի ունեցած այդ զանգվածային սպանությունների հետ կապված` Ադրբեջանի խորհրդարանի պատգամավոր Ֆազիլ Գազանֆարօղլուն դեռ փետրվարին faktxeber.com-ին տված բացառիկ հարցազրույցում հայտարարել է, որ Ադրբեջանի բանակում սպաներն ու հրամանատարները փող են հավաքում զինվորներից: Այդ մասին գրել է bizimdovr.az կայքը:

«Այդ իրադարձությունների առկայությունը` բանակում տիրող անկարգությունների և ոչ կանոնադրական հարաբերությունների վկայությունն է: Որոշ սպաներ և զորամասերի հրամանատարներ ճնշման տակ զինվորներից փող և այլ բաներ են պահանջում: Դրանք բերում են զինվորների ինքնասպանությանը, իրենցից բարձր կոչում ունեցողների հանդեպ սպանություններին: Բանակում բավականաչափ կոռուպցիոն դեպքեր կան, և այդ ցավալի վիճակը ծագում է բանակում առկա ապօրինություններից»,- ասել է ադրբեջանցի պատգամավորը: