Թուրքիան արձագանքել է իրեն սպառնող իրանցի գեներալի խոսքերին

Top-news. 28-11-2011- Ինչպես գրում է 1in.am կայքը, հղում կատարելով թուրքական Internet Haber կայքին՝ Թուրքիայի պաշտպանության նախարար Իսմեթ Յըլմազը պատասխանել է Իրանի իսլամական հեղափոխության պահակազորի օդա-տիեզերական զորքերի հրամանատար, գեներալ Ամիրալի Գաջիզադեի այն հայտարարությանը, որում նա բացահայտ սպառնացել էր իր երկրի վրա հարձակման դեպքում հարված հասցնել Թուրքիայում ՆԱՏՕ-ի հակահրթիռային պաշտպանության տարրերին։
Այս կապակցությամբ Իսմեթ Յըլմազը հայտարարել է. «Իրանցի գեներալի սպառնալիքները ոչինչ չեն նշանակում, քանի դեռ պաշտոնական հայտարարություն չի հնչել։ Իրանի քաղաքական ներկայացուցիչները պետք է կա՛մ հաստատեն, կա՛մ էլ հերքեն նրա խոսքերը։
Սխալ կլինի, եթե մենք սկսենք մեկնաբանել այդ հարցը՝ դրա մասին իմանալով ԶԼՄ-ներից։ Հակառակ դեպքում դա կարող է Իրանի կողմից արձագանքի պատճառ հանդիսանալ։ Տվյալ խնդրի շուրջ մեր պաշտոնական մեկնաբանությունները կտրվեն միայն իրանական կողմի պաշտոնական հայտարարությունից հետո»։
Հիշեցնենք, որ ներկայումս թուրք-իրանական հարաբերություններում առկա է որոշակի լարվածություն, ինչը պայմանավորված է Սիրիայի հանդեպ երկու երկրների հակադիր դիրքորոշմամբ եւ Թուրքիայի տարածքում Իրանի դեմ ուղղված ՆԱՏՕ-ի ռադիոտեղորոշիչ կայանի տեղակայմամբ։