Ինչու պետք է պառակտում լինի

«Լրագիր» 30-1-2012- Նախորդ շաբաթ ԱԺ ԲՀԿ, ՀՅԴ եւ Ժառանգություն խմբակցությունները հանդես են եկել համամասնական ընտրակարգի վերաբերյալ ԱԺ-ում խորհրդարանական լսումներ կազմակերպելու նախաձեռնությամբ: ԱԺ ԲՀԿ խմբակցության պատգամավոր Վարդան Բոստանջյանի հետ զրուցեցինք այդ թեմայով: - Ինչու որոշեցիք խորհրդարանական ընդդիմության հետ հանդես գալ համամասնական ընտրակարգի վերաբերյալ ԱԺ լսումներ անցկացնելու միասնական նախաձեռնությամբ: - Հասարակական մեծ հնչողություն ունեցող հարց առաջ եկավ` կապված համամասնական ընտրակարգին անցնելու հետ: Եվ ես կարծում եմ` չի կարելի առանց արձագանքի թողնել այս հարցը, առավել եւս` ԲՀԿ-ն դեռեւս 2007 թ. էր իր ծրագրում ամրագրել ամբողջությամբ համամասնական ընտրակարգին անցնելու գաղափարը: Հիմա քանի որ այդ հարցը բարձրացավ ու ստացավ մեծ հասարակական հնչեղություն, բնական է, որ մենք եւս արձագանքեցին: Ու հիմա քաղաքական երեք ուժեր` ԲՀԿ-ն, ՀՅԴ-ն ու Ժառանգությունը դիմում են ներկայացրել ԱԺ նախագահին խորհրդարանական լսումներ կազմակերպելու համար: Դրա արդյունքում պետք է հստակորեն կողմնորոշվենք այս պահին այդ գործընթացի իրականացումը տեխնիկապես հասցնում ենք, թե ոչ: - Այսինքն` հնարավոր են լսումներից հետո ԲՀԿ-ն հետ կանգնի այս մտադրությունից, թե ոչ: ՀՅԴ-ն այդ հարցը ճանաչել է հրատապ ու արտահերթ կարգով կներկայացնի խորհրդարանի քննարկմանը: Դուք կո՞ղմ եք լինելու դրան: - Իմ անձնական կարծիքն եմ արտահայտում. կարծում եմ, մենք պետք է միանանք դրան: Բայց այս խնդիրը մեր մյուս գործընկերների համար ավելի հստակ կարող է լինել միայն լսումներ անցկացնելու դեպքում: Արդյունքում՝ հնարավորություն կստանանք իմանալ՝ այս պահին ՀՀ-ում այդ թեման օրախնդիր է, թե ոչ: Ու բացի այդ, կան տեխնիկական խնդիրներ, լսումների ժամանակ կարող ենք պարզել՝ կարող ենք հասցնել այդ հարցը լուծել, թե ոչ: - Ձեր կարծիքով, այս հարցը օրախնդի՞ր է, թե ոչ: - Ես դրան հակված եմ եղել դեռ 2006 թ.: Ավելին, ես եղել եմ ԲՀԿ ծրագրի համահեղինակներից մեկը, այս գաղափարի կողմնակիցներից մեկը եւ իմ տեսակետը չեմ փոխել: - ԲՀԿ այս քայլը շատերը դիտում են որպես կոալիցիային, ՀՀԿ-ին դեմ գնալ, քանի որ ՀՀԿ-ն այլ կարծիք ունի, եւ ընդունված է համարել, որ պետք է միակարծիք լինեն իշխանական բոլոր ուժերը: - Ես չէի ուզենա հարցն այդպես դնել: Բայց եթե որոշ «ճոխ մտածողների» այդպես է թվում, թող մտածեն այդպես: Ինքս ասում եմ՝ ՀՀ առաջ հարց է դրվել, այն հիմա մեծ հնչեղություն է ստացել: Ու եթե առաջացել է հարցը, պետք է այն քննարկել, էթիկայից դուրս եմ համարում ի սկզբանե ասել՝ այդ հարցը ճիշտ է, թե սխալ: Տվյալ հարցի ճիշտ կամ սխալ լինելը կարելի է որոշել լայն ընդգրկմամբ խորհրդարանական լսումների անցկացման դեպքում, եւ ԲՀԿ-ն հանդես է եկել հենց նման առաջարկով: - Փաստ է, որ միայն ՀՀԿ-ն է դեմ համամասնական ընտրակարգին անցնելու գաղափարին: - ՀՀԿ-ն երբեք ընդգծված «դեմ» չի արտահայտվել համամասնական ընտրակարգի վերաբերյալ: Նրանք այս պահին միայն դնում են տեխնիկական խնդիրներ՝ ասելով, որ ուշացել ենք այս հարցը օրակարգում տեսնելու հարցում, քանի որ առաջիկա ընտրություններին քիչ ժամանակ է մնացել: ՀՀԿ-ն երբեք չի ասել, որ ինքը դեմ է համամասնական ընտրակարգին: - ՀՀԿ-ն ասում է, որ դուք ու Նաիրա Զոհրաբյանը եղել եք այս ԸՕ համահեղինակներից, ստորագրել եք նախագծի տակ ու այն ժամանակ չեք բարձրացրել այս հարցը, իսկ հիմա ձեր պահվածքը համարում են տարօրինակ: - Մենք ինքներս արել ենք բազմաթիվ առաջարկություններ, դրանք ըստ հրատապության ընդունվել են: Ինչ վերաբերում է համամասնական ընտրակարգին, ապա մեր աշխատանքային խմբի աշխատանքների ժամանակ համամասնական ընտրակարգին անցնելու գաղափարը չի եղել հրատապ: Հոկտեմբերին հանրապետությունում դեռ չէր հասունացել այս հարցը, որ դառնար նոր ընդունվելիք ԸՕ քննարկումների առարկա: - Հնարավո՞ր է սա հանգեցնի կոալիցիայի պառակտման: - Նման իրավիճակներում, երբ չես տիրապետում բազմաթիվ այլ, հետագայում առաջանալիք հարցերի, պատասխանը մեկն է` ոչինչ չի բացառվում: Բայց ես մտածում եմ`ինչու պետք է պառակտում տեղի ունենա, այս պահին մեր երկրի կայունությունն ու երկրի շահերը չեն ենթադրում պառակտում: - ԲՀԿ-ականների հետ վերջերս տարօրինակ դեպքեր են տեղի ունենում. իրար հետ առաջին հայացքից կապ չունեցող, սակայն կարծես մեկ շղթայի օղակներ լինեն այդ դեպքերը՝ ձերբակալություններ, ԲՀԿ-ից դուրս գալ եւ այլն: Մյուս կողմից, ԲՀԿ-ն է միանում ընդդիմության նախաձեռնությանը: Այսինքն՝ ինչ-որ պրոցեսներ, այնուամենայնիվ, տեղի են ունենում: - Դրա մասին դուք եք ասում, եւ ոչ միայն դուք, այլեւ շատերն են միտումներ տեսնում այս ամենում: Եթե ինչ-որ մարդիկ միտում են դնում այս գործընթացների տակ, պետք է մտածել՝ միգուցե իրականությանը համապատասխանում է դա: Ես ասում եմ՝ այդ գործելաոճը արատավոր է, եւ արատավորում է բոլոր նրանց, ովքեր այդ գործընթացները ծավալելիս մտածել են այդպես: - Երբ խորհրդարանում ՀՅԴ-ն հրատապ ճանաչելով համամասնական ընտրակարգի անցնելու հարցը, այն դնի օրակարգ, Հայ Ազգային Կոնգրեսն էլ իր հերթին է պատրաստվում այդ օրերին աջակցության հանրահավաքներ անել: Ձեր կարծիքով՝ հնարավո՞ր է այդ պրոցեսները ստիպեն, որ իշխանությունները գնան զիջումների, եւ եթե անգամ չանցնեն հարյուր տոկոսանոց համամասնական ընտրակարգի, ապա գոնե նվազեցնեն մեծամասնականի տեղերը: - Դա էլ մեծ նվաճում կլինի, եթե նվազեցվեն մեծամասնական տեղերը: Մենք նման դինամիկա ունեցել ենք. եթե սկզբում խորհրդարանը կազմավորվել էր հարյուր տոկոս մեծամասնական ընտրակարգով ընտրված պատգամավորներից, հետո աստիճանաբար այդ տեղերը նվազեցվեցին: Օրինակ՝ եթե մենք գանք փոխհամաձայնության ու այս ընտրություններում քսանհինգ մեծամասնական ընտրակարգ սահմանվի, դա եւս նվաճում կլինի: ԱՐՄԱՆ ԳԱԼՈՅԱՆ