Բանաստեղծուհի Սիլվա Կապուտիկյանի տուն-թանգարանի բացումը տեղի կունենա հունվարի 20-ին՝ նրա ծննդյան օրը

HayInfo. 12-1-2009- Սիլվա Կապուտիկյանի տուն-թանգարանի բացումը տեղի կունենա հունվարի 20-ին՝ հանրահայտ բանաստեղծուհու 90-ամյա հոբելյանին, երկուշաբթի մամուլի ասուլիսի ժամանակ հայտարարեց ՀՀ Մշակույթի նախարար Հասմիկ Պողոսյանը։ «Կապուտիկյանի տուն-թանգարանը մեր ժողովրդի մշակութային ժառանգության ևս մեկ օջախ կդառնա»,- ասաց նախարարը։ Պողոսյանի խոսքերով, արվեստի ակնառու գործիչների հոբելյաններին նվիրված միջոցառումների անցկացումն ուղղված է նրանց ժառանգության վերաիմաստավորմանը։ Այս առումով նախարարը հատկապես կարևորեց այնպիսի արժեքների ստեղծումը, ինչպիսիք են, օրինակ, գրքերի վերահրատարակումը, մեծերի հոբելյանների պատվին հուշարձանների կանգնեցումը։ Այս համատեքստում նա նշեց 2008 թ.-ին հայազգի ականավոր ամերիկացի գրող Վիլիամ Սարոյանի 100-ամյա հոբելյանի նշումը։ «Գրողի ստեղծագործությունների հիման վրա յոթ ներկայացում է բեմադրվել, Սարոյանի 8 գիրք հրատարակվել, ինչպես նաև ստեղծվել են երկու վավերագրական ու մուլտիպլիկացիոն ֆիլմեր»,- ասաց Պողոսյանը։ Խոսելով ևս մեկ կարևոր հոբելյանի՝ Սերգեյ Փարաջանովի 85-ամյակի մասին, նախարարը նշեց, որ հոբելյարին նվիրված տոնական աշխատանքները նոր են սկսվել, և բավականին «հարուստ ծրագիր» է նախատեսվում։ «Փարաջանովի 85-ամյակին նվիրված միջոցառումներ Հայաստանից բացի կանցկացվեն նաև մի շարք եվրոպական երկրներում, ինչպես նաև Ռուսաստանում»,- ավելացրեց նախարարը։ Սիլվա Կապուտիկյանը (1919-2006) 20-րդ դարի հայ խոշորագույն բանաստեղծուհին է, գրող և հրապարակախոս, ակադեմիկոս, բազմաթիվ միջազգային մրցանակների դափնեկիր, Հայկական ԽՍՀ մշակույթի վաստակավոր գործիչ։ Հայերեն և ռուսերեն լեզուներով ավելի քան 60 գրքերի հեղինակ է, որոնք նաև թարգմանված են աշխարհի շատ լեզուներով։