Թուրքիայի վարչապետը չի բացառել Հայաստանի նախագահի հետ հանդիպման հնարավորությունը

«Ազատություն». 28-1-2009- Թուրքիայի վարչապետ Ռեջեփ Էրդողանը Համաշխարհային տնտեսական համաժողովին մասնակցելու համար Դավոս մեկնելուց առաջ լրագրողների հետ այսօր կայացած հանդիպման ժամանակ չի բացառել Հայաստանի նախագահ Սերժ Սարգսյանի հետ հանդիպման հնարավորությունը: «Սարգսյանի հետ հանդիպմանը խանգարող հանգամանքներ չկան: Չեմ բացառում, որ հանդիպումը կայանա», - թուրքական Today’s Zaman թերթի փոխանցմամբ՝ ասել է Էրդողանը: Թուրքիայի վարչապետը նաեւ հայտարարել է, որ թեեւ հայկական սփյուռքը շարունակում է գործել Թուրքիայի դեմ, «Հայաստանի ներկայիս կառավարությունը չի կիսում [սփյուռքի] այդ քայլերը»: Թուրքիա-Հայաստան հարաբերություններին է անդրադարձել նաեւ Թուրքիայի արտգործնախարար Ալի Բաբաջանը, ով Դավոսում CNN Turk հեռուստաընկերության հետ հարցազրույցում ասել է. - «Եթե Թուրքիայի եւ Հայաստանի հարաբերություններում եղած խնդիրները լուծվեն 2009-ին, դա ինձ համար անակնկալ չի լինի»: Բաբաջանը շեշտել է, որ անհրաժեշտ է քաղաքական կամք դրսեւորել երկու երկրների միջեւ հարաբերությունների բարելավման հարցում, եւ հավաստել է, որ Թուրքիայում այդպիսի կամք կա: