Թուրքիան և արաբական երկրները Համագործակցության Խորհուրդ կստեղծեն

Aysor.am. 12-6-2010- Թուրքիան և արաբական երկրները` Լիբանանը, Հորդանանը և Սիրիան որոշում են կայացրել Համագործակցության Խորհրդի ձևավորման մասին, որի նպատակն է «անձանց և ապրանքների ազատ տեղաշարժը»: Այդ մասին հայտնում է Միգնյուզ.քոմ-ը: Թեև համամասնակցության հրավիրվում են բոլոր շահագրգիռ երկրները, Թուրքիայի արտգործնախարար Դավութօղլուն շտապել է հայտարարել, որ նոր կազմավորումը «ԵՄ-ին այլընտրանք չէ»: Նախարարը հայտարարել է, որ իր պետությունը դեռ չի կորցնում Եվրամիությանն անդամագրվելու հույսը, սակայն նման ցանկությունները չեն կարող խոչընդոտ լինել հարևան պետությունների հետ փոխհարաբերություններում: Համագործակցության Խորհրդի ստեղծման մասին համաձայնագիրը ստորագրվել է Ստամբուլում ավարտված Թուրք-արաբական տնտեսական համաժողովի ընթացքում: Աղբյուրը նշում է, որ ֆորումի մասնակիցները կանգնած ծափողջյուններով դիմավորեցին միջոցառմանը եկած Թուրքիայի վարչապետ Էրդողանին, որը «խաղաղության նավախմբի» հետ կապված դեպքից հետո դարձել է մահմեդական աշխարհի կուռքը: