Գլխավորը՝ ԼՂ հարցով ենթահանձնաժողովը վնաս չտա. ԱԳ նախարար

Tert.am. 22-6-2011- Գլխավորն այն է, որ Եվրոպայի խորհրդի Խորհրդարանական վեհաժողովում Լեռնային Ղարաբաղի հարցով ենթակոմիտեի վերակենդանացումը վնաս չտա։ Այս մասին Ստրասբուրգում լրագրողների հետ ճեպազրույցում ասել է ԱԳ նախարար Էդվարդ Նալբանդյանը։

«Ոչ միայն մենք, ինչը շատ կարևոր է նաև եռանախագահները հայտարարել էին, որ չեն գտնում, թե այս ենթակոմիտեի վերակենդանացումը կարող է օգտակար լինել կարգավորման գործընթացի համար: Սա է ամենակարևորը: Երբ մի բան ստեղծում ես կամ վերակենդանացնում ես, պետք է մտածես, թե ինչ օգուտ է տվել այդ կառույցը: Իսկ տվե՞լ է արդյոք օգուտ: Չեմ կարծում, որ ժամանակին երբ գործում էր օգուտ է տվել: Հիմա գլխավորը որ վնաս չտա»,- ասել է Նալբանդյանը:
Հիշեցնենք, որ այս օրերին Ստրասբուրգում անցկացվում է ԵԽԽՎ ամառային նստաշրջանը, որի ժամանակ այսօր ելույթով հանդես եկավ Հայաստանի նախագահը։
ԱՂԱՎՆԻ ՀԱՐՈՒԹՅՈՒՆՅԱՆ, Ստրասբուրգ, Ֆրանսիա