Ուտելուն չափ կա. մասնագետի խորհուրդը հայերին

Panorama.am. 1-7-2011- Մարդու օրգանիզմը ունի երեք ժամյա ցիկլ` սնվելու, հանգստանալու և մաքրվելու համար. առավոտյան ժամը 12-ից մինչև երեկոյան ժամը 20:00-ն մարդու օրգանիզմը վերալիցքավորվում է, 20:00-ից մինչև գիշերվա ժամը 4-ը օրգանիզմը հանգստանում է և դրանից հետո մինչև կեսօր` ժամը 12-ը օրգանիզմում կատարվում է մաքրման պրոցես:
«Այդ պրոցեսների յուրաքանչյուր խախտում կբերի մարսողական տրակտի խափանման: Այսինքն, եթե կարողանանք բոլորս պահպանել այդ ցիկլը, կունենանք լավ օրգանիզմ», -այսօր ասուլիսում հայտարարեց «Հայ խոհարարական ավանդույթների զարգացման և պահպանման» հասարակական կազմակերպության նախագահ Սեդրակ Մամուլյանը:
Սննդի օգտագործման սեզոնայնության մասին խոսելիս, խոհարարն ասաց, որ բնությունն ինքը թելադրում` ինչ ուտել ամռանը կամ տարվա մյուս եղանակներին: Բայց ամառը յուրահատուկ է նրանով, որ այս եղանակին պետք է ուտել շատ միրգ, շատ բանջարեղեն: Խոհարար Մամուլյանի խոսքով, յուրաքանչյուր ազգի ազգային խոհանոցը բնակլիմայական պայմանների արտացոլանքն է:
Մեզանում, օրինակ, բացառիկ կերակրատեսակ է համարվում սպասը: «Երբ ձմռանը մրսում ենք, ասում ենք տաք սպաս խմենք, լավանանք, իսկ ամռանը երբ շոգում ենք, ասում ենք սառը սպաս խմենք, զովանանք: Սա բացառիկ երևույթ է, և շատ ազգեր կուզենային այդպիսի կերակրատեսակ ունենալ իրենց կերակրացանկում», -իր մասնագիտական կարծիքն ասաց Մամուլյանը:
Կերակրացանկում խոհարարը մարդկանց խորհուրդ է տալիս ուտել պարզ ու թեթև նախուտեստներ, որոնք նաև համեմված չպետք է լինեն ասենք` մայոնեզով կամ կաթնային այլ սննդամթերքներվ:
«Աղցանը պետք է ճաշակենք այն ժամանակ, երբ սոված ենք լինում», -նշեց բանախոսը: Նախուտեստին հաջորդում է ապուրը, որը, ըստ խոհարարի, պետք է ուտել ճաշի ժամանակ և որը մեծ նշանակություն ունի: Աղանդերի մասին խոսելիս, խոհարարն ասաց, որ, օրինակ կրեմով տորթն օգտագորեծլը չի համապատասխանում մեր սննդակարգին և աղանդերը պետք է լինի այնպիսին, որ օգնի օրգանիզմի մարսողությանը: Որպես այդպիսին նա դիտարկեց մրգերը:
«Ես կուզենայի, որ մենք մեծ ուշադրություն դարձնենք մեր օրգանիզմի լեզվին, իսկ մեր օրգանիզմը մեզ հետ խոսում է: Օրինակ, ասում ենք ախորժակս տվեց այս կերակրատեսակը, այսինքն, մեր օրգանիզմում պակասել են այն նյութերը, որոնք առկա են այն կերակրատեսակի մեջ, որոնք մեր ախորժակը քաշում է», -նշեց մասնագետը` միաժամանակ հիշելով բոլորին հայտնի խոսքը. «Ուտելուն չափ կա»: