ՀԱԿ ձերբակալված ակտիվիստները մեղադրել են Ժիրայր Սեֆիլյանին ու Սարդարապատ շարժմանը

Մեկուսարանում գտնվելիս տեղեկացանք, որ բազմաթիվ հասարակական կազմակերպություններ դատապարտել են ոստիկանության կողմից մեր նկատմամբ իրականացրած բռնություններն ու զորակցություն հայտնել մեզ:
Բացառություն կազմեց «Սարդարապատ» խումբը, ով թեև «սատար կանգնեց» մեզ` Կոնգրեսի ակտիվիստներիս, բայց չխորշեց այն համեմել Կոնգրեսի հասցեին արված անպարկեշտ հայտարարություններով: Այսինքն, ձևականորեն զորակցություն հայտնելով մեզ, Սեֆիլյանն ու իր շրջապատը, փորձեցին հերթական անգամ շահարկել մեր անունը և սեպ խրել Կոնգրեսի երիտասարդական թևի ու նրա ղեկավար կառույցների միջև։ Այս առիթով մենք ուզում ենք նշել հետևյալը. վախկոտ ու ստրկամիտ են նրանք, ովքեր քաջության մասին հիշում են միայն հարցազրույցներում և հայտարարություններում ու պատահական չէ, որ նման մարդկանց շուրջ հավաքվածների թիվը չի անցնում մեկ տասնյակը, ինչն ասվածի լավագույն ապացույցն է: Նախկին փորձը ցույց է տվել, որ որևէ լարված պահի ոչ Ժիրայր Սեֆիլյանին, ոչ էլ նրա «հեղափոխական» ընկերներին ոչ-ոք չի տեսնում դեպքի վայրում, ոստիկանատների մոտ, դատարանների դիմաց և ոչ էլ մի իրավիճակում, որտեղ բռնության ենթարկվելու փոքր-ինչ վտանգ կա: Բայց մի բանում նրանք հետևողական են. Միշտ ամենալարված քաղաքական պահերին, լինի դա հանրահավաքների նախօրեին կամ նման միջադեպերի ժամանակ Կոնգրեսին հարված հասցնել թիկունքից:
Մենք, որպես Հայ Ազգային Կոնգրեսի մեծ թիմի անդամ, հաստատակամ ենք շարունակելու մեր պայքարը երկրում տեղի ունեցող բոլոր տեսակի ապօրինությունների դեմ, իսկ նրանք ովքեր իրական գործի փոխարեն ընտրում են անբարո ճամարտակությունների և հեռուներից փիլիսոփայելու ճանապարհը, այլ բան չեն անում, քան աջակցություն ցույց տալիս ներկա վարչախմբին:

Սարգիս Գևորգյան
Տիգրան Առաքելյան
Արտակ Կարապետյան
Սահակ Մուրադյան
Դավիթ Քիրամիջյան
Արեգ Գևորգյան
Վահագն Գևորգյան