Monday, August 22, 2011

Google+-ը սկսել է ստուգել օգտագործողների էջերի ինքնությունը

PanARMENIAN.Net - 22 օգոստոսի 2011 - Google-ն իր Google+ սոցիալական ցանցում ավելացնում է օգտագործողի ինքնությունը հաստատող պիտակներ (badges)։ Այս մասին գրել է Google-ի ներկայացուցիչներից Ուեն-Այ Յուն իր Google+ էջում։ Հաղորդում է IDG լրատվական ծառայությունը։
Ըստ Ուեն-Այ Յուի գրառման՝ Google+-ը այս պիտակները սկզբից կավելացնի հայտնի հանրային դեմքերի էջերին, իսկ ավելի ուշ սա կտարածվի բոլոր օգտագործողների շրջանում։
Այս պահին պիտակների հիմնական նպատակն է տեղեկացնել օգտագործողներին հանրային դեմքերի՝ երգիչների, դերասանների կամ քաղաքական գործիչների իրական էջերի մասին, որպեսզի օգտագործողները կարողանան ավելացնել և հետևել վերջիններիս իրենց (Circles)։ Հայտնիների էջերն այցելելիս ինքնությունը հաստատող պիտակը կերևա անվան կողքին։
Այլ սոցիալական ցանցեր, ինչպիսին Twitter-ն ու Facebook-ն են, նույնպես ունեն հանրային դեմքերի ստուգված էջեր։ Հաստատված օգտագործողներ ունենալը ցանցում ստեղծում է վստահելի միջավայր։
Այնուամենայնիվ, մի քանի շաբաթ առաջ Google-ը քննադատության էր ենթարկվել, երբ ագրեսիվորեն սկսել էր ջնջել ցանցից ոչ իրական էջեր։
Այս բողոքներին ի պատասխան՝ Google-ից տեղեկացրել էին, որ գործընթացը փոխվելու է, հնարավորություն է տրվելու ոչ իրական էջեր ունեցողներին կարգավորել և ուղղել դրանք։ Օգտագործողները վեճերի մեջ են Google-ի հետ իրական անունների քաղաքականության համար՝ պատճառաբանելով, որ որոշ դեպքերում հիմնավորված է օգտագործել մականուններ անվտանգության նկատառումներով։ Օրինակ՝ քաղաքական հայացքներ ունեցողների կամ ամուսնական բռնության զոհերի դեպքում։
Google+-ը ստեղծվել է հունիս ամսվա վերջում և կարճ ժամանակում հասցրեց ձեռք բերել 25 միլիոն օգտագործող։

No comments: