«ԱԶԳ», 03-09-2011- «Արմինյն միրոր սփեքթեյթր» շաբաթաթերթի փոխանցմամբ օգոստոսի 8-ին Անկարայում Միտհատ Փաշա պողոտայի վրա գտնվող «Անկարա Յափը» Արվեստի կենտրոնում կայացել է հայազգի երգիչ Արամ Տիգրանի մահվան երկրորդ տարելիցի ոգեկոչումը: «Արամը Մերձավոր Արեւելքի ժողովուրդների ձայնն է», նշել է այդ միջոցառման կազմակերպիչներից մեկըՙ Սաիտ Չեթինօղլուն : «Միրոր սփեքթեյթրը» լուրը արտատպել է «Հուրրիեթ դեյլի նյուզ» թերթից, որտեղ Վերջիհան Զիլֆիօղլուն հավելել է, որ երկրորդ միջոցառումը երգչի հիշատակին կայանալու է հոկտեմբերի 15-ին Դիարբեքիրում: Արամ Տիգրանը հանրությանը քաջածանոթ է առավելաբար իր քրդերեն երգերով: «Նա ազատության համար պայքարող ժողովուրդների երգիչն է, ճնշված մարդկանց շունչը: Եթե մենք չենք կարող նրա մարմինը ֆիզիկապես ետ բերել, ապա կարող ենք նրա ձայնն ու շունչը մի անգամ եւս ըմբոշխնել», ասել է Չեթինօղլուն:Հայազգի երգիչը վախճանվել էր Հունաստանում օգոստոսի 8-ին երկու տարի առաջ եւ իր կտակում ցանկություն էր հայտնել թաղվել Դիարբեքիրում: Թուրքական կառավարությունը մերժել էր ցանկություննՙ ասելով, որ նա Թուրքիայի քաղաքացի չէր:
«Նախարարության որոշումով մարդիկ, որոնք Թուրքիայի քաղաքացի չեն, կարող են թաղվել այս հողում: Պետք է հարգեին Տիգրանի ցանկությունը, բայց նրանք մերժեցին, որովհետեւ նա հայ էր», հայտարարել է Չեթինօղլունՙ ակնկալելով աջակցություն բոլոր նրանց կողմից, ովքեր հավատում են ժողովուրդների բարեկամությանը:
Կառավարության մերժումից հետո Տիգրանի ընտանիքը դիմել էր արտգործնախարարություն եւ մշակույթի նախարարություն, բայց դրական պատասխան չստանալով, երգիչ Արամ Տիգրանի մարմինը ի վերջո հողին էր հանձնվել Բրյուսելում:
«Տիգրանի հորինած երգերը բազմաբնույթ էին: Նա նաեւ երգում էր տարբեր լեզուներով եւ բոլորովին զարմանալի չէ, որ հայ լինելով նա մեծապես նվիրված էր քրդական երաժշտությանը: Մենք կոգեկոչենք նրա հիշատակը Դիարբեքիրում հոկտեմբերի 15-ին», եզրակացրել է Չեթինօղլուն:
Tehran Time
Yerevan Time
No comments:
Post a Comment