Այսօր ԱՄՆ Կոնգրեսի Ներկայացուցիչներ պալատը դիտարկելու է Թուրքիայի քրիստոնեական համայնքների գույքի վերադարձման բանաձևը

1in.am. 13-12-2011- Թուրքական Sabah թերթի փոխանցմամբ՝ այսօր ԱՄՆ-ի Կոնգրեսի Ներկայացուցիչներ պալատի օրակարգում է ընդգրկվել թիվ 306 բանաձևը, որում թուրքական իշխանություններին կոչ է արվում երկրի քրիստոնեական համայնքներին, մասնավորապես՝ հայկական, հունական ու ասորական փոքրամասնություններին, վերադարձնել զավթված եկեղեցիները, վանքերը և այլ հոգևոր ինստիտուտներ։
Փաստաթուղթը պատրաստել է Կալիֆոռնիայից ընտրված կոնգրեսական Էդվարդ Ռոյսը, որը միաժամանակ հանդիսանում է Կապիտոլիումի բլրում հայկական աջակցության խմբի համանախագահը։
Փաստաթղթում Թուրքիային կոչ է արվում հարգել քրիստոնյա քաղաքացիների իրավունքները։ Ռոյսն ընդգծել է, որ Թուրքիայում քրիստոնյաների մշտական հետապնդումները նկատվել են ոչ միայն ԱՄՆ օրենսդիրների, այլև գործադիր իշխանության կողմից։ Մասնավորապես, ԱՄՆ պետդեպարտամենտը երեք տարի շարունակ ազդարարում է Թուրքիայում կրոնական ազատությունների խնդրի մասին։
Թեև փաստաթղթում բացակայում է «Ցեղասպանություն» բառը, սակայն նշված է, որ հայերը, ինչպես նաև մյուս քրիստոնյա համայնքները Օսմանյան կայսրությունում ենթարկվել են զանգվածային սպանությունների և էթնիկ զտման։

Հիշեցնենք, որ այս տարվա հուլիսի 20-ին ԱՄՆ Կոնգրեսի արտաքին հարաբերությունների կոմիտեն ձայների` 43 կողմ եւ 1 դեմ հարաբերակցությամբ ընդունել էր թիվ 306 բանաձևը։