Իրանի Ազգային անվտանգության գերագույն խորհրդի քարտուղար Սաիդ Ջալիլին շաբաթ Ստամբուլում միջնորդ «վեցյակի» հետ հանդիպումից հետո հայտարարել է, որ իսլամական պետության իշխանությունները գոհ են միջուկային ծրագրի շուրջ կայացած բանակցություններից:
«Բանակցությունների ընթացքում առաջընթաց է գրանցվել: Իհարկե, եղել են տարակարծություններ, սակայն կարևորն այն պահերն են, որոնց ժամանակ մենք համաձայնության ենք եղել»,- 10 ժամ տևած բանակցություններից հետո լրագրողներին ասել է Ջալիլին` հույս հայտնելով, որ բանակցությունների հաջորդ «ռաունդն» առավել պտղաբեր կլինի:
Ստամբուլյան հանդիպմանը «վեցյակի» պատվիրակությունը գլխավորել է Եվրամիության արտաքին քաղաքական ու անվտանգության հարցերով հանձնակատար Քեթրին Էշթոնը:
Ինչպես հաղորդում է «ՌԻԱ Նովոստի» գործակալությունը, նա հանդիպման ավարտից հետո հայտարարել է, որ Եվրամիությունը ողջունում է Իրանի հետ երկխոսության շարունակությունը և ընդգծում դրա կառուցողականությունը:
Էշթոնը նաև հայտնել է, որ Իրանի ու «վեցյակի»` Գերմանիայի ու ՄԱԿ-ի Անվտանգության խորհրդի 5 մշտական անդամների (ԱՄՆ, Ռուսաստան, Չինաստան, Մեծ Բրիտանիա, Ֆրանսիա) միջև բանակցությունների հաջորդ փուլը կանցկացվի մայիսի 23-ին, Բաղդադում:
Monday, April 16, 2012
Subscribe to:
Post Comments (Atom)
No comments:
Post a Comment