Գերմանիան պատրաստ է Թուրքիայի հետ բանակցությունները վերսկսելուն

Tert.am. 16-5-2012- Գերմանիայում վերջին ընտրություններին Թուրքիայի՝ ԵՄ-ին անդամակցելուն ընդդիմացողների պարտությունը հնարավորություն է ստեղծում սառեցված բանակցությունները վերսկսելու համար, Today’s Zaman-ի հաղորդմամբ նման հայտարարություն է արել Գերմանիայի արտգործնախարար Գիդո Վեստերվելեն Թուրքիայում: «Գերմանիայում կայացած վերջին ընտրություններից հետո մենք հնարավորություն, ինչպես նաև խնդիր ունենք այդ սառեցված իրավիճակը հաղթահարելու: Թուրքիայի հետ հարաբերություների ընդլայնումը բխում է ինչպես Թուրքիայի, այնպես էլ Եվրոպայի շահերից»,- ասել է Գիդո Վեստերվելեն Ստամբուլի համալսարանում կայացած «Կրոնենբերգի Ֆորումի» ընթացքում: Պարբերականը նշում է, որ Վեստերվելեն ելույթ է ունեցել այն ժամանակ, երբ Ֆրանսիայում ևս Թուրքիայի համար հուսադրող փոփոխություններ տեղի ունեցան: Ըստ պարբերականի՝ Թուրքիայի ԵՄ-ին անդամակցության ամենից շատ ընդդիմացողներից մեկին` Նիկոլա Սարկողիին փոխարինեց Ֆրանսուա Օլանդը: