Սպանվել է Ադրբեջանի ռազմաօդային ուժերի հրամանատարը

«Ազատություն» - 11-2-2009- Այսօր Բաքվում սպանվել է Ադրբեջանի ռազմաօդային ուժերի հրամանատար Ռաիլ Ռզաեւը: Ինչպես «Ռոյթերզ» գործակալությանը փոխանցել է Ադրբեջանի պաշտպանության նախարարության խոսնակ Էլդար Սաբիրօղլուն, անհայտ մարդասպանը Ռզաեւի վրա կրակել է նրա տան շքամուտքի մոտ, եւ նա մահացել է հիվանդանոցում: Ադրբեջանի ներքին գործերի նախարարությունում «Ռոյթերզ»-ի աղբյուրը, իր հերթին, հայտնել է, որ սպանությունը տեղի է ունեցել տեղական ժամանակով առավոտյան ժամը 8-ի սահմաններում: Արձակված միակ գնդակը դիպել է Ռզաեւի գլխին: Ադրբեջանի զինված ուժերի գլխավոր շտաբի պետ Նիջմեդին Սադիխովը Lider հեռուստատեսությանը տված հարցազրույցում ասել է, թե տեղեկություններ չունի սպանության հնարավոր շարժառիթների մասին: Նա նշել է, թե ըստ նախնական տեղեկատվության` Ռզաեւի ավտոմեքենան մի քանի օր հսկողության տակ է եղել: Գեներալ-լեյտենանտ Ռզաեւը հետխորհրդային Ադրբեջանում 1990-ականներից ի վեր սպանված ամենաբարձրաստիճան պաշտոնյան է: Նա գլխավորում էր Ադրբեջանի օդուժը 1992 թվականից: Ըստ «Ռոյթերզ»-ի, Ռաիլ Ռզաեւը Ադրբեջանի ներկայացուցիչն էր Գաբալայի ռադիոլոկացիոն կայանի օգտագործման հարցով Ռուսաստանի եւ Միացյալ Նահանգների միջեւ բանակցություններում: