Panorama.am. 19-7-2010- Արտասահմանյան մամուլը հաճախ է գրում Իրանի դեմ հնարավոր ռազմական գործողությունների ժամանակ Ադրբեջանի տարածքի ԱՄՆ-ի և Իսրայելի կողմից օգտագործվելու մասին: Սակայն այդ շարքում կանադական «The Globe and Mail» թերթում հրապարակված հոդվածը կարելի է բավական սենսացիոն համարել:
«Ենի Մուսավաթը» հայտնում է, որ «Venator Capital Management» կենտրոնի տնօրեն Ավներ Մանդելմանը կանադական թերթում հակամարտությունների և գլոբալ բազաների վերաբերյալ հրապարակած հոդվածում նշելով, որ ԱՄՆ-ը և Իսրայելը հունիսին սկսել է ուժեր կուտակել Իրանի շուրջ, գրել է, որ ավելի վաղ ԱՄՆ-ի «USS Harri Trumen» ինքնաթիռներ փոխադրող նավերի խումբը, Իսրայելի ռազմական նավերի ուղեկցությամբ, անցնելով Սուեզի ջրանցքով, մտել է Պարսկական ծոց:
«Դրանից երկու շաբաթ անց ԱՄՆ-ի և Իսրայելի ռազմափոխադրական ինքնաթիռներից կազմված օդային շարասյունը վայրէջք է կատարել Ադրբեջանում և դատարկել իրենց հետ բերած ինչ-որ «սարքավորումներ»: Այդ իրադարձությունը ստիպել է Իրանին ռազմական տագնապ հայտարարել»,- գրել է Ա.Մանդելմանը:
Թեև հոդվածում չի ասվում, թե Բաքու բերված գաղտնի բեռների մասին լուրը որ աղբյուրներից է ստացվել, սակայն հայտնի է, որ հունիսի վերջերին Իրանն իսկապես բարձր ռազմական պատրաստվածություն է հայտարարել Ադրբեջանի հետ սահմանների երկարությամբ` այնտեղ տեղափոխելով մեծ քանակությամբ ցամաքային զորքեր, զրահապատ տեխնիկա և հրթիռային զորամիավորումներից կազմված ռազմական շարասյուներ:
Իրանի հեղափոխության պահապանների կորպուսի բրիգադի գեներալ Մոհսին Մյոինին իրանական ԶԼՄ-ների հետ զրույցում այդ միջոցառումների անհրաժեշտությունը հիմնավորել է նրանով, որ տեղեկություններ ունեն Ադրբեջանի տարածքում ԱՄՆ-ի և Իսրայելի կողմից հատուկ սպառազինություն տեղակայվելու մասին:
Իրանական ԶԼՄ-ներն այդ ժամանակ հայտնել են նաև, որ Իսրայելի ռազմական օդանավերը Իրանի դեմ օգտագործելու նպատակով ինչ-որ սարքավորումներ են իջեցրել Սաուդյան Արաբիայի Տաբուկ քաղաքում:
«Ենի Մուսավաթը» հայտնում է, որ Իրանի դեմ հարձակման ժամանակ Իսրայելի` Ադրբեջանի տարածքից օգտվելու հնարավորության մասին նշվում է նաև Լոնդոնում գտնվող Օքսֆորդի համալսարանի հետազոտական կենտրոնի համար պատրաստված զեկույցում: Այդ զեկույցում ցույց է տրվել, որ Իրանի դեմ Իսրայելի հարձակումները կարող են տարածաշրջանում խոշորածավալ և երկարաժամկետ պատերազմի բերել, արդյունքում ավելի լուրջ ձևով ապակայունացնել իրավիճակն ամբողջ աշխարհում:
Monday, July 19, 2010
Subscribe to:
Post Comments (Atom)
No comments:
Post a Comment