Իրանը Պարսից ծոցում հրթիռներ է փորձարկել

Tert.am. 25-9-2012- Իրանը երեկ Պարսից ծոցում 4 հրթիռ է փորձարկել: Այս մասին «Ֆարս» գործակալությանը տեղեկացրել է ռազմածովային նավատորմի հրամանատար ադմիրալ Ալի Ֆադավին: Ավելի վաղ Ֆադավին ամերիկյան զորքերի ներկայությունը Պարսից ծոցում «օկուպացիա» էր որակել: «Պարսից ծոցն ու Հորմուզի նեղուցը կենսական նշանակություն ունեն Իրանի համար և կպաշտպանվեն ցանկացած գնով»,- իր հերթին հայտարարել է Իրանի պաշտպանության նախարար Ահմեդ Վահիդին: Խոսելով տարածաշրջանային անվտանգության մասին` Վահիդին ասել է, որ այդ անվտանգությունը խախտվել է միջազգային զորավարժությունների ընթացքում: Սեպտեմբերի 16-27-ը Պարսից ծոցում ընթանում են լայնամասշտաբ միջազգային IMCMEX-12 (International Mine Countermeasures Exercise) հակաականային միջազգային ծովային զորավարժությունը։