Հունվարի 1-ից բարձրացել են կենսաթոշակները

Հունվարի 1-ից հանրապետությունում 16,6 տոկոսով ավելացել են կենսաթոշակները: Միջին ամսական կենսաթոշակի չափը 2009թ-ին կկազմի 10 հազար 211 դրամ` 2008թ-ի 8 հազար 760-ի փոխարեն: Բարձրացվում է նաեւ երեխայի ծննդյան միանվագ` ներկայումս գործող նպաստի չափը եւ ներդրվում է երեխաների ծննդյան հաջորդականությամբ պայմանավորված խրախուսման ամբողջական համակարգ: 2009թ-ին նպաստի չափն առաջին եւ երկրորդ երեխայի ծննդյան դեպքում կկազմի 50 հազար դրամ` 2008թ-ի 35 հազար դրամի փոխարեն, իսկ երրորդ եւ ավելի երեխա ունենալու դեպքում կհատկացվի 430 հազար դրամ` 2008թ. 300 հազար դրամի փոխարեն: Բարձրանցել են նաեւ ուսուցիչների աշխատավարձերը. մանկավարժական անձնակազմի միջին ամսական հաշվար¬կային աշխատավարձը մեկ դրույքի հաշվով, ներառյալ լրացուցիչ վարձատրությունները, կկազմի 116.3 հազ. դրամ` 2008 թվականի 89.6 հազ. դրամի դիմաց: Ընթացիկ տարվանից ավելացվում են նաեւ բուժաշխատողների աշխատավարձերը. մասնավորապես հիվանդանոցային բուժօգնություն իրականացնող բուժհաստատություններում բժշկական անձնակազմի աշխատողների միջին ամսական աշխատավարձը կկազմի 66,4 հազար դրամ` 2008թ. 51,1 հազար դրամի փոխարեն: