News.am. 3-12-2009- Աթենքում կայացած ԵԱՀԿ երկրների արտգործնախարարների խորհրդի նիստում 56 երկրների արտգործնախարարներ նշել են ղարաբաղյան հիմնախնդրի կարգավորման դրական տեղաշարժի մասին, հայտնում է ԵԱՀԿ-ի պաշտոնական կայքը։
Նախարարներն իրենց աջակցությունն են հայտնել ԵԱՀԿ Մինսկի խմբին՝ կոչ անելով խնդրի խաղաղ լուծման համար պահպանել բանակցային գործընթացի դրական դինամիկան։ «Մենք աջակցում ենք կողմերի հանձնառությանը` Մադրիդյան փաստաթղթի հիման վրա համաձայնեցնել Լեռնային Ղարաբաղի հակամարտության խաղաղ կարգավորման Հիմնարար սկզբունքների վերջնական լուծումը եւ համոզված ենք, որ այսօր հնարավոր է կառուցել ապագան, որտեղ կտիրեն տարածաշրջանային խաղաղությունը, կայունությունն ու բարգավաճումը»,- ասված է նախարարների հայտարարության մեջ։
Նախարարները վերահաստատել են իրենց հանձնառությունը՝ եռանդուն աշխատել չլուծված հարցերը կարգավորելու, համաձայնության հասնելու ուղղությամբ, մասնավորապես` Հելսինկիի եզրափակիչ փաստաթղթում ամրագրված` ուժի կամ դրա սպառնալիքի չկիրառման, տարածքային ամբողջականության, ժողովուրդների իրավահավասարության և ինքնորոշման սկզբունքների հիման վրա:
Հիշեցնենք, որ նախօրեին ԵԱՀԿ Մինսկի խմբի համանախագահող երկրների պատվիրակությունները եւ Հայաստանի ու Ադրբեջանի արտգործնախարարները հանդես էին եկել համատեղ հայտարարությամբ։
Thursday, December 3, 2009
Subscribe to:
Post Comments (Atom)
No comments:
Post a Comment