Հայոց ցեղասպանության ժխտումը քրեականացնող օրինագիծը մարդուն զրկում է խոսքի ազատության իրավունքից. ԵԽԽՎ նախագահ

Tert.am. 12-1-2012- Ֆրանսիայի խորհրդարանի կողմից Հայոց ցեղասպանության ժխտումը քրեականացնող օրինագծի ընդունումը մարդուն իր հիմնարար իրավունքից` խոսքի ազատությունից զրկելու օրինակ է։ Ինչպես հաղորդում է ադրբեջանական Trend.az կայքը, այս մասին հայտարարել է Եվրոպայի խորհրդի խորհրդարանական վեհաժողովի (ԵԽԽՎ) նախագահ Մեվլութ Չավուշօղլուն ( ի դեպ, հունվարի 23-ին լրանում է այդ պաշտոնում Չավուշօղլուի պաշտնավարման ժամկետը)։ Ֆրանսիայի Ազգային ժողովն անցած ամիս ձայների ճնշող մեծամասնությամբ ընդունեց Հայոց ցեղասպանության ժխտումը քրեականացնելու մասին օրինագիծը։ Նոր օրինագծի համաձայն՝ Ֆրանսիայում Հայոց ցեղասպանությունը ժխտողներին մինչև 1 տարվա ազատազրկում է սպառնում և 45.000 եվրո տուգանք։ Դրանից անմիջապես հետո Թուրքիայի վարչապետ Ռեջեբ Թայիբ Էրդողանը Ֆրանսիային մեղադրեց 20–րդ դարի կեսերին ալժիրցիների ցեղասպանության մեջ։ Օրինագիծը Ֆրանսիայի Սենատում կքննարկվի հունվարի 23–ին։