«Լեռնային Ղարաբաղի ընտրությունները վնասում են բանակցային գործընթացին». Ադրբեջանի ԱԳՆ

Ադրբեջանական 1news.az-ի փոխանցմամբ՝ Ադրբեջանի ԱԳՆ-ի պաշտոնական ներկայացուցիչ Էլման Աբդուլաևն անդրադարձել է վաղը Լեռնային Ղարաբաղում կայանալիք նախագահական ընտրություններին. «Այդ ընտրությունները վնասում են Ղարաբաղյան հակամարտության կարգավորման բանակցային գործընթացին: Հայկական կողմը փորձում է այդ ընտրությունների միջոցով ամրագրել ներկայիս ստատուս քվոն, որի անընդունելիությունը ճանաչվել է միջազգային հանրության կողմից: Օտար երկրների բոլոր այն քաղաքացիները, որոնք դիտորդի կարգավիճակով կժամանեն Լեռնային Ղարաբաղ, պաշտոնական Բաքվի կողմից կհայտարարվեն անցանկալի անձ (persona non grata)»: Նշվում է, որ ԼՂՀ-ի նախագահական ընտրություններին մասնակցելու են Չեխիան, Ռուսաստանը, ԱՄՆ-ը, Ֆրանսիան, Կիպրոսը, Արգենտինան, Ուրուգվայը, Կանադան և այլ երկրներ, ինչպես նաև Մերձդնեստրը, Աբխազիան և Հարավային Օսիան ներկայացնող 74 դիտորդներ: