Թուրքիան բացեիբաց սպառնում է Սիրիային

Report.am. 10-8-2012- Թուրքիայի արտգործնախարար Ահմեդ Դավութօղլուն ուղղակի մեղադրել է

սիրիական իշխանություններին՝ Քրդական աշխատավորական կուսակցությանը աջակցելու մեջ։ Մի կազմակերպություն, որը Թուրքիան ահաբեկչական է համարում։ "Բաշար Ասադը նրանց զենք է տալիս։ Այո, դա արդեն ենթադրություն չէ, այլ՝ փաստ։ Մենք արդեն անհրաժեշտ միջոցներ ձեռք ենք առել՝ այդ վտանգը չեզոքացնելու համար",-ասել է Դավութօղլուն։ Նա նշել է, որ թուրքական հետախուզությունը Քրդական կուսակցության անդամների է հայտնաբերել սիրիական Կոբանի եւ Աֆրին քաղաքներում, որոնց զինել է սիրիական կառավարությունը։ Ավելի վաղ թուրք պաշտոնյաները բազմիցս հայտարարել են, որ թույլ չեն տա քուրդ գրոհայիններին՝ հանգիստ հիմնավորվել հարեւան երկրում։ Ավելին, Անկարան սպառնացել է զորք մտցնել այն տարածքներ, որտեղ քրդերի ակտիվություն կնկատվի։ Իր խոսքերն ավելի ծանրակշիռ դարձնելու համար Թուրքիան սիրական սահմանին է մոտեցրել առնվազն 3 զորախումբ՝ ուղղաթիռներով ու զրահամեքենաներով հանդերձ, ինչպես նաեւ՝ ռմբակոծիչ ավիացիայի լրացուցիչ ուժեր։ Անցած շաբաթ այդ զորախմբերը ցուցադրական զորավարժություններ են անցկացրել Սիրիայից ընդամենը մի քանի կմ հեռավորության վրա։ Բացի այդ, Անկարան խոստացել է միջամտել Սիրիայի քաղաքացիական պատերազմին, եթե կառավարական ուժերը փորձեն կոտորածներ սկսել Հալեպում։ Հիշեցնենք, որ այդտեղ արդեն 2 շաբաթ է՝ թեժ մարտեր են մղվում Ասադի կողմնակիցների եւ զինյալ ապստամբների միջեւ։ Սիրիայի կառավարությունն առայժմ չի արձագանքել Դավութօղլուի հայտարարությանը, բայց ավելի վաղ Դամասկոսը մեկ անգամ չէ, որ փորձել է ամեն ինչ անել՝ հանգստացնելու համար իր հյուսիսիային հարեւանին։ Եվ դա հասկանալի է. սիրիական զորքերը, որ 1.5 տարի չեն կարողանում հաղթել թեթեւ զինված ապստամբներին, ոչ մի շանս չեն ունենա բազմաքանակ, լավ սպառազինված ու վարժեցված թուրքական բանակի դեմ։