Թբիլիսիի մի շարք հասարակական կազմակերպություններ դեմ են Հայ-թուրքական

/PanARMENIAN.Net/ 08.10.2009 - «Մենք կողմ ենք հայ-թուրքական սահմանի բացմանը, սակայն առանց այդ արձանագրությունների, քանի որ դրանք ամբողջությամբ նախապայմաններ են»,-PanARMENIAN.Net-ի թղթակցի հետ զրույցում հայտարարել է Վրաստանի Համագործակցության հայկական կենտրոնի ղեկավար Ալեքսանդր Օհանյանը: Նրա խոսքերով, սահմանը պետք է Թուրքիան բացեր, քանի որ նա էր այն միակողմանի կերպով փակել 1993թ.` խախատելով բոլոր միջազգային ակտերը: «Մենք դեմ ենք այդ Արձանագրությունների վավերացմանը, քանի որ դրանք զրկում են հայերին իրենց պատմական հողերի իրավունքից, քանի որ Հայաստանը արդեն դե-յուրե ճանաչում է Թուրքիայի սահմանները»,-ասել է Օհանյանը: Նա նաեւ հավելել է, որ եթե հոկտեմբերի 10-ին Ցյուրիխում Հայ-թուրքական արձանագրությունները ստորագրվեն, ապա իրենց կազմակերպությունը Վրաստանի Հայ ուսանողների միության եւ Վրաստանի հայ համայնքի հետ համատեղ մտադիր է բողոքի ցույցեր անցկացնել Վրաստանում ՀՀ դեսպանատան շենքի առջեւ` բողոքելով այդ Արձանագրությունների վավերացման դեմ, ինչպես նաեւ մտադիր է բաց նամակով դիմել Հայաստանի խորհրդարանին ու նախագահին: