Իրան-Պակիստան գազատարի շինարարությունը կավարտվի հաջորդ տարի

Իրան-Պակիստան գազատարի շինարարությունը կավարտվի հաջորդ իրանական տարվա առաջին կեսին (արևային տարին

սկսվում է 2013թ. մարտի 21-ին): Այս մասին, ինչպես տեղեկացնում է Trend-ը, ասել է Իրանական ազգային գազային ընկերության գործադիր տնօրենը: Ջավադ Օվջին հավելել է, որ գազատարի շինարարությունը 90 տոկոսով կավարտվի արդեն ընթացիկ տարեվերջին: Այս մասին հայտնում է IRIB գործակալությունը: Ապրիլին Իրանի տնտեսական խորհուրդը թույլատրել էր կառուցել Իրան-Պակիստան գազատարի երկրորդ մասը, որը 290 կմ ձգվում է իրանական սահմանով ու կավարտվի 2014թ.: Գազատարը Իրանի տարածքում կունենա 1150 կմ երկարություն, որոնցից արդեն կառուցված է 907կմ-ը` Ասալուեից մինչև Իրանշեհրա: ԱՄՆ-ն արդեն զգուշացրել է Պակիստանին հնարավոր պատժամիջոցների մասին, եթե շարունակի Իրանի հետ իրագործել գազատարի շահագործման ծրագիրը: