Թուրք դիվանագետները խիստ քննադատության են ենթարկել «Հայերից ներողություն խնդրելու» մտավորականների նախաձեռնությունը

Մոտ 60 թուրք դիվանագետներ խիստ քննադատության են ենթարկել «Հայերից ներողություն խնդրելու» նախաձեռնությունն ու այդ արշավը ձեռնարկած մտավորականներին` դա որակելով որպես «դավաճանություն»: Այս մասին հաղորդում են թուրքական լրատվամիջոցները: Պաշտոնաթող դեսպանների ու դիվանագետների հրապարակած հայտարարությունում նշվում է, թե նման արշավը «հակասում է ազգային շահերին»: «Նման սխալ եւ միակողմանի արշավն անարգում է մեր պատմությունը: Սա նշանակում է դավաճանություն ինչպես Օսմանյան կայսրության վերջին շրջանում, այնպես էլ Հանրապետության ժամանակաշրջանում ահաբեկչական գործողությունների զոհ դարձած մեր հայրենակիցների նկատմամբ: Պատերազմական պայմաններում տեղի ունեցած 1915-ի հայկական տեղահանությունն ունեցավ դառը հետեւանքներ, սակայն թուրք մարդու` հայկական ապստամբությունների եւ ահաբեկչական գործողությունների հետեւանքով կրած կորուստներն ու ցավերն էլ քիչ չեն»,- նշվում է հայտարարության մեջ: Հիշեցնենք, որ օրեր առաջ մի խումբ թուրք մտավորականներ` Բասքըն Օրանը, Ահմեդ Ինսելը, Ջենգիզ Աքթարը եւ Ալի Բայրամօղլուն, հանդես են եկել «Ներողություն եմ խնդրում» խորագրով արշավ սկսելու նախաձեռնությամբ, որի շրջանակում կազմակերպվել է ինտերնետային ստորագրահավաք, եւ արդեն կան առաջին արձագանքները: Այս նախաձեռնության նպատակն է ներողություն խնդրել հայերից «1915թ.-ի իրադարձությունների նկատմամբ ցուցաբերված անտարբերության եւ ժխտման համար»: Հիշեցնենք նաեւ, որ այս նախաձեռնության առաջին քննադատողներից է Թուրքիայի «Ազգայնական շարժում» կուսակցության առաջնորդ Դեւլեթ Բահչելին: Վերջինս իր գրավոր հայտարարության մեջ նշելով, թե հայերը ստում են` ամեն հարմար առիթի դեպքում հայտարարելով, որ 20-րդ դարասկզբին ենթարկվել են ցեղասպանության, ընդգծել է, թե թուրքերի «բնական եւ պատմական իրավունքն է» ներողություն ակնկալել հենց հայերից` թուրք ազգին բռնության ենթարկելու, օսմանյան պետական գործիչներին, Հանրապետության շրջանի դիվանագետներին սպանելու եւ «ղարաբաղյան ջարդերի» համար: