Ադրբեջանահայերը պատրաստ են վերադառնալ իրենց նախկին բնակության վայրեր

News.am. 1-7-2010- ԼՂ խնդրի լուծումը գտնվում է վճռորոշ փուլում եւ Ադրբեջանը քարոզչական պատերազմ սանձազերծելով նպատակ ունի նախապատրաստել իրենց բնակչությանը ռեւանշիստական պատերազմի: Հուլիսի 1-ին լրագրողների հետ հանդիպման ժամանակ նման տեսակետ հայտնեց Ադրբեջանահայերի ասամբլեայի ղեկավար Գրիգորի Այվազյանը: «Չայլուի դիվերսիայից հետո արդեն հարց չկա պատերազմ լինել-չլինելու մասին։ Պատերազմի վերսկսման հարցը Ադրբեջանի համար ժամանակի հարց է »,-ասաց Այվազյանը՝ նշելով, որ մենք պետք է ըստ արժանվույն պատրաստվենք այդ պատերազմին։ Անդրադառնալով վերջերս ադրբեջանցի լրագրողի կողմից ՀՀ նախագահ Սերժ Սարգսյանին ուղղված այն հարցին, թե նա ե՞րբ կարող է վերադառնալ իր «հայրենիք» Աղդամ, Այվազյանն ասաց. «Մենք ֆլյուեր Իլհամ Ալիեւին մի այսպիսի հարց ենք հղում. Մենք` ադրբեջանահայերս, ե՞րբ կկարողանանք վերադառնալ մեր բնակավայրեր` Բաքու, Ադրբեջանի կողմից գրավված այլ հայկական շրջաններ»։ Նա նաեւ նշեց, որ Հայաստանում բնակվող ադրբեջանահայերից շատերը ցանկություն ունեն վերադառնալ իրենց ծննդավայրեր։ Նրանք դիմել են Հայաստանում ՄԱԿ-ի Փախստականների գծով գլխավոր հանձնակատար Բ. Հալեպոտային, որպեսզի վերջինս օգնի եւ նախապատաստի ադրբեջանահայ փախստականների վերադարձը նախկին բնակության վայրեր։ «Ադրբեջանը պետք է իմանա, որ վերադարձելիությունը պետք է լինի փոխադարձ, կամ ընդհանրապես պետք է նման հարց չշոշափվի»,- ընդգծեց Այվազյանը։