Քլինթոն. Իրանը փորձում է օգուտ քաղել Մերձավոր Արևելքի խառնաշփոթ իրավիճակից

Tert.am. 16-4-2011- Իրանը փորձում է օգուտ քաղել Մերձավոր Արևելքի հակամարտություններից, ըստ Associated Press-ի, հայտարարել է ԱՄՆ պետքարտուղար Հիլարի Քլինթոնը։

Քլինթոնը նշել է, որ Թեհրանը գործում է այնպես, որպեսզի օգուտ քաղի արաբական երկրների ապստամբություններից և օգտագործում է այդ հուզումները հօգուտ սեփական շահերի։ Նրա խոսքերով Իրանը փորձում է խախտել տարածաշրջանի խաղաղությունն ու կայունությունը և երկարաձգել հակամարտությունը։
Ավելի վաղ «Հաարեց» թերթը հաղորդում էր, որ Իրանը, օգտվելով Մերձավոր Արևելքում բռնկված անկարգությունների ալիքից, վերջին ամիսներին ավելացրել է մաքսանենգ ճանապարհով զենքի մատակարարումը «Հըզբոլլահին», Սիրիային և Պաղեստինին։
«Իրանը գլխավոր սադրիչն է տարածաշրջնում՝ Աֆղանստանից ու Եմենից մինչև Եգիպտոս ու Մարոկկո»,- ասել է «Հաարեցին» Իսրայելի բարձրաստիճան պաշտոնյաներից մեկը։ Արևմտյան հատուկ ծառայությունների տվյալներով՝ այս պահին առգրավվել է իրանական անօրինական զենքի միայն մի մասը։
Ծոցի արաբական երկրների համագործակցության խորհրդի (ԾԱԵՀԽ) երկրները նույնպես ապրիլի 3-ին ԾԱԵՀԽ արտահերթ նիստի ժամանակ մեղադրել են Իրանին կազմակերպության անդամ երկրների գործերին միջամտելու համար։
Հանդիպման մասնակիցները Իրանին մեղադրել են Բահրեյնում ներքին երկպառակություն գցելու փորձերի, ինչպես նաև Եմենի ներքին գործերին միջամտելու մեջ։