Դեմիրթաշը հերքում է. քրդերը խորհրդարանում չեն բոյկոտելու երդմնակալության

Tert.am. 17-6-2011- Թուրքական «Միլլիյեթ» օրաթերթի տարածած այն տեղեկությունը, թե 3 քուրդ պատգամավորներ պատրաստվում են բոյկոտել խորհրդարանում կայանալիք երդմնակալության արարողությունը, չի համապատասխանում իրականությանը։ Այս մասին, ինչպես տեղեկացնում է «Դողան» գործակալությունը, հայտարարել է «Խաղաղություն և ժողովրդավարություն» քրդամետ կուսակցության նախկին առաջնորդ, պատգամավոր Սելահեթթին Դեմիրթաշը։

«Օրակարգում նման հարց չկա։ Այդ տեղեկությունները չեն համապատասխանում իրականությանը»,– հայտարարել է Դեմիրթաշը։

Ինչպես ավելի վաղ տեղեկացրել էինք, թուրքական «Միլլիյեթ» օրաթերթը լուրեր էր տարածել այն մասին, թե «Խաղաղություն և ժողովրդավարություն» քրդամետ կուսակցության աջակցությունը վայելող նորընտիր անկախ պատգամավորներ Էրթուղրուլ Քյուրքչյուն, Սըրրը Սյուրրեյա Օնդերը և Լևենթ Թյուզելը որոշում են կայացրել հունիսի 24-ին Թուրքիայի Ազգային մեծ ժողովում կայանալիք պատգամավորների երդմնակալության արարողության ժամանակ չարտաբերել «Հավատարիմ եմ մնալու Աթաթուրքի սկզբունքներին» և «Պատվովս եմ երդվում փառապանծ թուրք ժողովրդի առջև» արտահայտությունները։