Չավուշօղլուն Ծիծեռնակաբերդ չի այցելի

7or.am, 11-5-2010- Ինչպես հայտնի է, Հայաստան է ժամանելու Եվրոպայի խորհրդի Խորհրդարանական վեհաժողովի նախագահ, ազգությամբ թուրք Մովլութ Չավուշօղլուն։ «7օր»-ի՝ «Ծիծեռնակաբերդ այցելություն նախատեսվո՞ւմ է, թե՞ ոչ» հարցին ի պատասխան՝ ՀՀ նախագահի և ԱԳՆ մամուլի պատասխանատուներ Արմեն Արզումանյանն ու Տիգրան Բալայանը խորհուրդ են տվել դիմել ՀՀ Ազգային ժողովին, քանի որ Չավուշօղլուն խորհրդարանական հյուր է, և օրակարգը կազմվելու է Ազգային ժողովի կողմից։ ՀՀ ԱԺ հասարակայնության հետ կապերի վարչության պետ Գոհար Պողոսյանը «7օր»-ին ասել է, որ Չավուշօղլուն Հայաստան է ժամանում ոչ թե պաշտոնական, այլ աշխատանքային այցով, ինչը օտարեկրյա հյուրին ազատում է Ծիծեռնակաբերդ այցելելու արարողակարգային անհրաժեշտությունից. -Ծրագրում գրված է աշխատանքային այց, և Ծիծեռնակաբերդ այց նախատեսված չէ,- նշել է նա։ Մեր ունեցած տեղեկություններով, սակայն, տեղի է ունեցել հետևյալը. սկզբում նախատեսվել էր, որ Չավուշօղլուի այցը պաշտոնական է լինելու, որով պարտադիր կերպով պետք է լիներ այց Ծիծեռնակաբերդ, սակայն թուրք դիվանագետը հրաժարվել է ընդունել այդ արարողակարգը, և նախագահականի հետ համաձայնություն է ձեռքբերվել, որ Չավուշօղլուի այցը սահմանվի աշխատանքային, որպեսզի նա կարողանա խուսափել Հայոց ցեղասպանության զոհերի հուշահամալիր այցելելուց։ Այսինքն, ՀՀ իշխանությունները բավարարել են թուրք դիվանագետի պահանջը, և որոշվել է փոխել այցի բնույթը։ Սա հիշեցնում է Երևան Գյուլի այցելության ժամանակ տեղի ունեցած այն դեպքը, երբ ոչ պաշտոնապես հրահանգվել էր անջատել Ծիծեռնակաբերդի լույսերը, երբ Թուրքիայի նախագահը գտնվում էր «Հրազդան» մարզադաշտում։ Փաստորեն, «նախաձեռնողական» քաղաքականությունը դեռ շարունակվում է։